الاعجوبة: الأب فادي روحانا

"الاعجوبة"

بآمن أنو الأعجوبة مش أعمى يشوف، 

أو مقعد يمشي، أو مريض يتعافى... 

الأعجوبة هي الناس الطيبة يلّي بتغمرك بقلبها وحضورها المشعّ بوقت العتمة، والشدّة...

الأعجوبة أنو يجي حدا يساعدك لا عالبال ولا عالخاطر...

الأعجوبة يزورو الملايكة حياتك بشكل بشر، وتبتسم...

الأعجوبة يزيح الله من حياتك أشخاص مفكرن بحبّوك، ويوقع قناعن فجأة قدّامك...

الأعجوبة تطلع من مصيبة مش بقوتك بل بصلاة أمّك...

الأعجوبة هي رجوعي للإيمان وليسوعي بوقت الوجع والدمع... فصار إيماني أكبر من صليبي...

الأعجوبة أنك ما تخاف من الموت وتصير أنت المريض تعطي قوة ورجا ونعمة من حواليك... 

ويزيد مرضك منسوب المحبة بهالدني...

الأعجوبة أنك تفرح بزهرة صغيرة ع حفّة حيط... 

تفرح بعصفور ع سطيحة... تفرح بكلمة وببسمة...

تفرح بطلوع الشمس، تفرح بسهرات النجوم وأنت قاعد قدّام باب البيت عالهدا... وزيز الليل يسايرك من بعيد بهونيك صنوبرة...

"الأب فادي روحانا"